प्रत्येक वयोगटासाठी आर्थिक गुंतवणुकीचा प्लॅन

मित्रहो वय वाढत असताना, तुमची आर्थिक उद्दिष्टे आणि गरजा स्वाभाविकपणे बदलत जातील. वयाच्या 20 व्या वर्षात वापरलेली गुंतवणूक रणनीती तुम्ही निवृत्तीच्या जवळ पोहोचत असताना योग्य नसू शकते. तुमच्या पोर्टफोलिओमधील गुंतवणुकींचे मिश्रण – म्हणजेच संपत्तीचे वाटप (Asset Allocation) – दीर्घकालीन आर्थिक यशासाठी महत्त्वाचे आहे. तुम्हाला करिअरच्या सुरुवातीपासून निवृत्तीपर्यंत तुमची रणनीती कशी बदलावी लागेल याचे मार्गदर्शन खालील लेखात देण्याचा प्रयत्न करत आहे.

निवृत्ती दूर असल्यामुळे, तुम्ही जास्त जोखीम घेऊन संभाव्यत: जास्त परतावा मिळवू शकता. तुमचा पोर्टफोलिओ इक्विटीकडे जास्त झुकू शकतो. तुम्ही Large Cap आणि Mid Cap फंडांचे मिश्रण विचारात घेऊ शकता. Large Cap fund मोठ्या 100 स्टॉक्समध्ये गुंतवणूक करतात, तर Mid Cap फंड 150 पुढील स्टॉक्समध्ये गुंतवणूक करतात. तुम्ही SIP (सिस्टेमॅटिक इन्व्हेस्टमेंट प्लॅन) मार्गाने सुरूवात करू शकता जिथे तुम्ही तुमच्या बजेटनुसार रक्कम दर महिन्याला भरू शकता, परंतु तुमचे उत्पन्न वाढत असताना वर्षागणिक दर महिन्याला SIP योगदान वाढविण्यास विसरू नका.

त्याचप्रमाणे Debt मध्ये, EPF (कर्मचारी भविष्य निधी) आणि PPF (सार्वजनिक भविष्य निधी) सुरक्षिततेसाठी गुंतवणूक करा. याशिवाय, लिक्विड फंडांमध्ये 3-6 महिन्यांच्या खर्चाचे आपत्कालीन फंड तयार करू शकता.

तुम्हाला घर खरेदी किंवा मुलांच्या शिक्षणाचा खर्च यासारख्या मोठ्या गोष्टींसाठी तरतूद करावी लागेल. या टप्प्यावर, स्थिरता आणि वाढीसाठी इक्विटीमध्ये Large Cap फंड आणि Multi Cap फंडाचे मिश्रण ठेवणे योग्य ठरू शकते. SEBI ने जाहीर केलेल्या नियमानुसार, मल्टी-कॅप फंड मोठे, मध्यम आणि लहान कॅप स्टॉक्समध्ये किमान 25 टक्के गुंतवणूक करतात. Debt मध्ये, EPF आणि PPF सुरू ठेवता येईल आणि चांगल्या कॉर्पोरेट बाँड फंड मध्ये गुंतवणुकीचा विचार करू शकता.

निवृत्ती जवळ येत असल्याने, वाढीपासून संरक्षणाकडे लक्ष केंद्रित करून जोखीम कमी करण्याची वेळ आली आहे. त्यानुसार, तुमची इक्विटी वाटणी कमी करणे योग्य पर्याय असू शकतो. Large Cap फंड आणि Balanced Advantage फंड स्थिरता देऊ शकतात. बॅलन्स्ड अॅडव्हांटेज फंड, (याच फंडाला डायनॅमिक अॅसेट अलोकेशन फंड देखील म्हटले जाते) इक्विटी आणि debt मधील संपत्तीचे वाटप बाजारातील हालचालीनुसार करत असते. या योजनेचा उद्देश इक्विटी आणि डेटमध्ये गुंतवणुक करून अस्थिरता कमी करणे आहे. तसेच Debt मध्ये, सरकारी सिक्युरिटीजकडे (Government Securities Bonds) लक्ष केंद्रित करता येईल.

या टप्प्यावर, प्राथमिक उद्दीष्ट म्हणजे भांडवल राखणे आणि नियमित उत्पन्न निर्माण करणे. महागाईशी लढण्यासाठी काही इक्विटी गुंतवणूक कायम ठेवणे योग्य ठरू शकते, Large Cap आणि बॅलन्स्ड अॅडव्हांटेज फंडांमध्ये राहणे चांगले.

नियमित उत्पन्नासाठी SWP (सिस्टेमॅटिक विथड्रॉल प्लॅन) सेट करा. SWP तुमच्या म्युच्युअल फंड गुंतवणुकीतून ठराविक रक्कम आपोआप काढून घेतो आणि ती रक्कम ठराविक तारखेला तुमच्या बँक खात्यात जमा करतो. Debt साठी, SCSS (वरिष्ठ नागरिक बचत योजना) आणि चांगल्या दर्जाचे अल्प-मुदतीचे डेट फंड विचारात घेतले जाऊ शकतात.

शेवटी, सर्व वयोगटांसाठी, जीवनातील महत्त्वाच्या घटना किंवा बाजारातील बदलांवर आधारित तुमची रणनीती लवचिक ठेवा आणि प्लॅन करा. प्रत्येकाची गुंतवणूक क्षमता, जोखीम घेण्याची क्षमता, इतर उत्पन्न या घटकांच्या आधारे संपत्तीचे वाटप बदलू शकते.

वर दिलेल्या योजना सामान्यतः संदर्भासाठी दिल्या आहेत. गुंतवणूक करण्यापूर्वी तुमच्या आर्थिक सल्लागाराचा सल्ला घ्या.

मातृभाषेतून शिकूया, प्रगती करूया !